الفصل الأخير
نهاية بدون نهاية
مش كل اللى بنتمناه ف حياتنا بنقدر نحققه ... فعلا . بس كمان أوقات القدر بيبعتلنا حاجات أحلى بكتير من اللى كنا بنتمناه . حاجات تخلينا ندمع لمجرد فرحتنا انها حصلتلنا حاجات بترجع الامل لينا من جديد فى الحياة
وده اللى حصل مع أميرة بعد ما قررت انها تقفل قلبها عن اى حب ممكن يألمها أو يألم اللى حواليها وقررت انها تبعد عن اى حاجة ممكن تألمها وإنها تركز ف دراستها وحياتها وبس .
لكن ... فى يوم اتصلت بيها صديقتها وطلبت منها انها تقابلها ف الجامعة ووافقت وقررت تسافرلها عشان تقابلها وباليل حست بحاجة غريبة حست انها محتاجة تسمع صوت حبيبها الاول أو تعرف عنه أى حاجة تطمن بيها عليه وحاولت انها تكلمه ع الفيس أو تبعتله رسالة لكن اتراجعت ف اخر لحظة وقررت انها متعملش كدا وده اللى حصل .
وسافرت الصبح للجامعة وقابلت أصاحبها هناك وكان نفسها اوى انها تتكلم معاهم وتحكيلهم على اللى حسته وانها تعبانة بس قبل ما تحكى لقيت ان صديقتها عندها مشكلة وحتاجة انها تتكلم معاها اوى وهنا قررت اميرة انها تنسى مشكلتها وتمثل انها مبسوطة ومفيش عندها حاجة عشان تقدر تسمع صديقتها وتحل معاها مشكلتها وفعلا حصل وقدرت هى وصديقتها التانية انها تحل المشكلة .
وفى لحظة كانوا مع بعض حكتلها صديقتها حاجة غريبة مكنتش متوقعاها قالتلها ان حبيبها الاول كلمها امبارح وانه سأل عليها وحابب انه يطمن عليها وكان نفسه يكلم اميرة اوى وانه عايزها تسامحه .
وقتها أميرة محستش بنفسها غير ودموعها بتنزل منها من غير ما تحس وافتكرت اللى حصلها امبارح باليل وهى بتحاول انها تكلمه وتفكيرها فيه طول الليل .. بس كمان مقدرتش تعمل حاجة غير انها تكتفى انها تعرف انه بخير وانه لسة فاكرها مش ناسيها واكتفت بده ومحاولتش تعرف حاجة تانى جايز عشان خايفة ترجع تتعلق بيه تانى أو عشان مش حابة تدى لنفسها أمل برجوعه ليها وقررت انها تسمع الكلام من صديقتها وتكتم جواها احساسها عشان متقلقش اصدقائها .
بس الحقيقة انها كانت مبسوطة اوى بالكلام اللى سمعته وحست بالراحة أنها مش لوحدها اللى لسة بتفكر فيه وانها لسه على باله . واللى حصل ده إداها الأمل فى انها تعيش حياتها بسعادة وأتأكدت أنها مغلطتش معاه فى اى حاجة ومش هبالغ لو قلت انه رجعلها حياتها اللى كانت على وشك انها تنتهى .
أوقات كتير اللى بيحصل من غير ما نتوقعه بيبقى أفضل بكتير وبيبقى رحمة من ربنا وتذكير لينا إن ربنا لسة موجود ورحمته وسعت كل شئ . فعلا دائما القدر يخبئ لنا ما هو أفضل لكن كل اللى محتاجينه اننا نصبر على كل شئ فكل حاجة فى وقتها جميله والحب كمان لو جيه فى وقته وبالحلال أكيد هيكون أجمل وأروع بكتير
كل اللى المفروض نعمله واللى قررت أميرة انها تعمله بعد اللى حصل هو إنها تزيد ثقتها فى ربنا وتقرب منه أكتر لأنه هو الأحق بقلبها وحبها " ولأن الله هو القادر على كل شئ "
القادم أجمل بإذن الله
وهذه ثقتى بربى .
:)
النهاية .
